მატჩის შემდეგ ტიაგო მოტას მიმართულებით არაერთი კრიტიკული პოსტი თუ კომენტარი გავრცელდა. 42 წლის სპეციალისტს თითქმის ყველა იტალიური გამოცემა აკრიტიკებს და პირველ რიგში მის გადაწყვეტილებებზე საუბრობენ.
დუშან ვლაჰოვიჩის თაობაზე შეიძლება ტიაგო მოტას ვერავინ შეედავოს, რადგან მის ადგილას რანდალ კოლო მუანი თამაშობს, რომელიც ტურინულ გუნდს იდეალურად მოერგო. ფრანგი ფეხბურთელის ანგარიშზე უკვე 5 გატანილი გოლი და 1 საგოლე გადაცემაა, თუმცა ახლა ვლაჰოვიჩსა და კოლო მუანიზე არ ვისაუბრებთ, არამედ ყურადღებას კენან ილდიზზე გავამახვილებთ.
იმის მიუხედავად, რომ თურქმა ფეხბურთელმა სეზონი ძალიან კარგად დაიწყო, ტიაგო მოტამ ბოლო პერიოდში 19 წლის ვინგერი სათადარიგოთა სკამს შეაჩვია — ილდიზი ბოლო მატჩებში დიდ სათამაშო დროს საერთოდ ვეღარ იღებს და შეიძლება ითქვას, რომ როტაციის ფეხბურთელად ჩამოყალიბდა, რაზეც როგორც თავად ფეხბურთელს, ისე გულშემატკივრებსაც პრეტენზია აქვთ. როგორც იტალიური მედია იუწყება, სეზონის ბოლომდე სიტუაცია თუ არ შეიცვლება, დიდი შანსია თურქმა ფეხბურთელმა გუნდის დატოვება გადაწყვიტოს. ბევრი რამ თავად ტიაგო მოტაზეც იქნება დამოკიდებული, რადგან მისი პოზიციებიც სერიოზულად არის შერყეული და არის შანსი ზაფხულში გუნდი იტალიელმაც დატოვოს.
ფაქტია, ტიაგო მოტა ილდიზის პოტენციალს ბოლომდე ვერ იყენებს და ამის გამო გუნდი ზარალდება. საინტერესოა უახლოეს თვეებში როგორ გაგრძელდება იტალიელისა და თურქის ურთიერთობა, თუმცა ახლა ფაქტია მხარეებს შორის სერიოზულ კონფლიქტს აქვს ადგილი.
