რამდენიმედღიანი მოლაპარაკებები საბოლოო შეთანხმებით დასრულდა, ჟოაო პედრო ბრაიტონიდან კარიერას ჩელსიში გააგრძელებს! მხარეებმა გარიგების ყველა დეტალი შეათანხმეს, 23 წლის ფორვარდს ლონდონში უკვე ელოდებიან, სადაც ახალ კლუბში სამედიცინო შემოწმებას გაივლის და 7-წლიან კონტრაქტს მოაწერს ხელს. ჩელსი ჟოაო პედროს სანაცვლოდ £60 მილიონს გადაიხდის.
იმის მიუხედავად, რომ ბრაზილიელი ფეხბურთელის ტრანსფერზე ნიუკასლიც მუშაობდა, სიტუაცია მას შემდეგ შეიცვალა, რაც საქმეში ჩელსი ჩაერთო. ჟოაო პედრომ პრიორიტეტი სტემფორდ ბრიჯის ბინადრებს მიანიჭა, სწორედ ამიტომ კლუბებმა შეთანხმება მარტივად მოახერხეს. ენცო მარესკას ახალგაზრდა ფეხბურთელის დამატება ძალიან სურდა.
ჟოაო პედრო ბრაიტონის ღირსებას 2023 წლიდან მოყოლებული იცავდა. ფეხბურთელმა ამ დროში 70 მატჩის ჩატარება მოასწრო, გაიტანა 30 გოლი და 8 საგოლე გადაცემითაც გამოიჩინა თავი. შეგახსენებთ, ჩელსიმ რამდენიმე საათის წინ ჯეიმი გიტენსის ტრანსფერიც დახურა.
