სლოვაკეთში, ევროპის ახალგაზრდული ჩემპიონატი დასკვნით ფაზაში შევიდა. მაყურებელს წინ ფინალური მატჩი ელოდება, სადაც ერთმანეთს ინგლისი და გერმანია დაუპირისპირდებიან. შეხვედრა 28 ივნისს, თბილისის დროით 23:00 საათზე დაიწყება, თუმცა, ამ სტატიაში ამ დაპირისპირების შესახებ არ ვისაუბრებთ, არამედ მოგიყვებით ტურნირის ერთ-ერთ მთავარ აღმოჩენასა და მის პოტენციურ ტრანსფერზე.
საუბარი რა თქმა უნდა ნიკ ვოლტემადეზეა! შტუტგარტის 23 წლის ფორვარდი ტურნირის მთავარი აღმოჩენაა. ახალაგზრდა ფეხბურთელის ანგარიშზე არც მეტი, არც ნაკლები 6 გატანილი გოლი და 3 საგოლე გადაცემაა. სწორედ ამ სტატისტიკის გამო, მის გარშემო საუბრები არ წყდება. ვოლტემადე თითქმის ყველა ევროპულ გრანდს დაუკავშირეს, თუმცა ბოლო საათებში გავრცელებული ინფორამციის თანახმად, ფეხბურთელი დიდი შანსია ბაიერნში გადაბარგდეს!
დიახ, "რეკორდმაისტერსა" და ვოლტემადეს შორის წინასწარი სიტყვიერი შეთანხმება უკვე შედგა, გერმანელი ფორვარდისთვის 5-წლიანი კონტრაქტი გამზადებულია, ვენსან კომპანის გუნდი კი შტუტგარტთან მოლაპარაკებებს ოფიციალურად იწყებს.
გერმანული პრესის ინფორმაციით, შტუტგარტი 23 წლის ფორვარდს დაახლოებით €50-60 მილიონად აფასებს. იმის მიუხედავად, რომ ბაიერნში ჰარი კეინი ჰყავთ, კლუბში ფიქრობენ, რომ ვოლტემადეს დონის ტალანტის ხელში ჩაგდება სწორი ნაბიჯი იქნება. კლუბებს შორის პირველი კონტაქტი უახლოეს დღეებში შედგება. საქმეში სხვა ტოპ კლუბებიც არიან, თუმცა ამ მომენტისთვის ფავორიტი ცალსახად ბაიერნია.
