ზამთრის სატრანსფერო ფანჯრის ნახევარი უკვე გავიდა, ნაპოლის დაანონსებული აქტიურობა კი ამ დრომდე არ ჩანს. იმის მიუხედავად, რომ ანტონიო კონტეს გუნდი მიმდინარე თვეში 2-3 ფეხბურთელის დამატებას გეგმავდა, 15 იანვრის მონაცემებით "პარტენოპეის" არც ერთი ახალი ტრანსფერი არ განუხორციელებია.
რაც შეეხება პოტენციურ წამსვლელებს, როგორც რამდენიმე კვირის წინ მოგახსენეთ, ანტონიო კონტესთან შეთანხმებით, კლუბმა ლორენცო ლუკა, ნოა ლანგი და დავიდ ნერესი ტრანსფერზე დააყენა, თუმცა სიტუაცია გარკვეულწილად შეიცვალა და ამ სტატიაში სწორედ ამ მოთამაშეების შესახებ ვისაუბრებთ.
როგორც ირკვევა, დავიდ ნერესმა ანტონიო კონტეს აზრი შეაცვლევინა და ბრაზილიელი ვინგერი ზამთრის სატრანსფერო ფანჯრის დროს ნაპოლის აღარ დატოვებს. რაც შეეხება ზემოხსენებულ ორ ფეხბურთელს, ლორენცო ლუკა და ნოა ლანგი კვლავ ტრანსფერზე არიან დაყენებული და "პარტენოპეი" მათ სანაცვლოდ ყველა შეთავაზებას განიხილავს.
კლუბთან დაახლოებული წყაროების ინფორმაციით, იმ შემთხვევაში თუ ლორენცო ლუკა და ნოა ლანგი ნაპოლის დატოვებენ, კლუბი მათ შემცვლელებს აუცილებლად დაიმატებს, რაც იმას ნიშნავს, რომ ნეაპოლელებს შეიძლება საკმაოდ საინტერესო იანვრის მეორე ნახევარი ჰქონდეთ.
