რამდენიმე საათის წინ დაწყებული მოლაპარაკებები საბოლოო შეთანხმებით დასრულდა — ენდი დიუფი ლანსიდან კარიერას ინტერში გააგრძელებს! მხარეებს შორის წინასწარი სიტყვიერი შეთანხმება უკვე შედგა, კლუბები გარიგების ბოლო დეტალებს ამ წუთებში აგვარებენ. 22 წლის ფეხბურთელი იტალიაში უახლოეს საათებში გაემგზავრება, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. საუბარია დაახლოებით €25 მილიონიან გარიგებაზე.
ენდი დიუფი ლიგა 1-ის ერთ-ერთი გამორჩეული ნახევარმცველია, სწორედ ამიტომ 22 წლის ფრანგის დამატებას მიმდინარე სატრანსფერო ფანჯარაზე საკმაოდ ბევრი კლუბი ცდილობდა, საიდანაც ერთ-ერთი ნაპოლი იყო. "პარტენოპეის" შეთავაზება ლანსმა გასულ კვირას დაბლოკა, შემდეგ კი საქმეში ინტერი ჩაერთო და გარიგებაც დაიხურა.
ფრანგი ფეხბურთელი რენის აკადემიის აღზრდილია, ხოლო ლანსის ღირსებას 2023 წლიდან მოყოლებული იცავდა. ენდი დიუფმა ამ დროში 68 მატჩის ჩატარება მოასწრო, გაიტანა 2 გოლი და 2 საგოლე გადაცემითაც გამოიჩინა თავი.
