მანჩესტერ იუნაიტედში მომდევნო სეზონისთვის მზადებას აგრძელებენ. სეზონის ბოლოს მაიკლ კერიკის საკითხი გადაწყდება, თუმცა მისი მომავალი კლუბის სატრანსფერო გეგმებს დიდად არ შეცვლის. "წითელ ეშმაკებთან" დაახლოებულ წყაროებს თუ დავუჯერებთ, ზაფხულში გუნდს მინიმუმ 9 ფეხბურთელი დატოვებს, რაც იმას ნიშნავს, რომ ოლდ ტრაფორდის ბინადრებს წინ დატვირთული სატრანსფერო ფანჯარა ელოდებათ.
ალთაი ბაინდირი, ანდრე ონანა, ტაილერ მალასია, მანუელ უგარტე, კაზემირო, ჯეიდონ სანჩო, მარკუს რაშფორდი, რასმუს ჰოილუნი, ჯოშუა ზირკზე — ეს მოთამაშეები ახალ სეზონს აუცილებლად ახალ გუნდებში დაიწყებენ. ამ სიიდან კაზემირო და ჯეიდონ სანჩო გუნდს თავისუფალი აგენტის სტატუსით დატოვებენ, ხოლო სხვა ზემოთ ჩამოთვლილი ფეხბურთელების სანაცვლოდ მანჩესტერ იუნაიტედი სოლიდურ ფინანსურ შევსებას მიიღებს.
ზაფხულის სატრანსფერო ფანჯრის მოახლოებასთან ერთად, მანჩესტერ იუნაიტედის პოტენციურ სამიზნეებზე უფრო მეტი ინფორმაცია გახდება ცნობილი, თუმცა ერთი რამ ფაქტია, მომდევნო სეზონის წინ, გუნდის არსებული შემადგენლობა სერიოზულად გადახალისდება.
