ევროპა ლიგის ფინალში განცდილი მარცხის შემდეგ, მანჩესტერ იუნაიტედის კაპიტანმა ბრუნო ფერნანდეშმა მედიასთან ისაუბრა.
"მანჩესტერ იუნაიტედში ვიქნები იქამდე, სანამ კლუბი არ მეტყვის, რომ წასვლის დროა. თუ კლუბში ფიქრობენ, რომ დროა გზები გაიყოს, რადგან ფულის შოვნა ან რამე მსგავსი სურთ, ამას მივიღებ... ფეხბურთი ზოგჯერ ასეთია.
ჩემთვის მთავარი საფიქრალი ფინანსური მხარე არასდროს ყოფილა. თუ ფინანსური მხარის არჩევა მსურს, ყოველთვის მექნება წასვლის შესაძლებლობა, მაგრამ ეს არ არის მთავარი. მე მინდა ტიტულების მოგება და საუკეთესო ტურნირებზე მონაწილეობა.
რუბენ ამორიმი? ვფიქრობ, რომ ის ჩვენთვის შესაფერისი მწვრთნელია. არ ვფიქრობ, რომ ამ სეზონში ნაჩვენები პერფორმანსი აჩვენებს, თუ ვინ არის ამორიმი და რა შეუძლია რეალურად. ვფიქრობ, რომ ის ამ კლუბის კარგი მომავლისთვის შესაფერისი ადამიანია."
შეგახსენებთ, ალ ჰილალი ბრუნო ფერნანდეშის ტრანსფერზე უკვე რამდენიმე კვირაა რაც მუშაობს. ზაფხულის სატრანსფერო ფანჯრის მოახლოებასთან ერთად, 30 წლის პორტუგალიელი ფეხბურთელის თაობაზე უფრო მეტი ინფორმაცია გახდება ცნობილი.
