ბარსელონაში ახალი სეზონისთვის მომზადებას აქტიურად აგრძელებენ. ჰანსი ფლიკის გუნდმა ჟოან გარსია უკვე წარადგინა, თუმცა კატალონიელები ამაზე გაჩერებას არ აპირებენ. როგორც ცნობილი ხდება, ბარსა მიმდინარე სატრანსფერო ფანჯრის დროს 4-5 ფეხბურთელს კიდევ შეიძენს.
ბოლო საათებში გავრცელებული ინფორმაციის თანახმად, ინტერის ერთ-ერთი ლიდერის დენზელ დუმფრისის შეძენით ჰანსი ფლიკის გუნდი სერიოზულად ინტერესდება. დიახ, კატალონიელების ინტერესი რეალური და დადასტურებულია. მეტიც, ბარსელონამ 29 წლის ნიდერლანდელი ფეხბურთელის თაობაზე ინფორმაცია რამდენიმე კვირის წინ მოითხოვა.
როგორც ირკვევა, დენზელ დუმფრისის კონტრაქტში გამოსასყიდი თანხა €25 მილიონი წერია, რომელიც ივლისის შუა რიცხვებამდე აქტიური იქნება. ამ მომენტისთვის ბარსელონას ფეხბურთელის თაობაზე ინტერისთვის ჯერ არ მიუმართავს, თუმცა მომდევნო დღეებში ამ პოტენციურ ტრანსფერთან დაკავაშირებით შესაძლოა სიახლეები იყოს. დენზელ დუმფრისის სიტუაციას სხვა ევროპული კლუბებიც ყურადღებით აკვირდებიან.
დენზელ დუმფრისი ინტერის ღირსებას 2021 წლიდან მოყოლებული იცავს. სერია A-ს ერთ-ერთმა გამორჩეულმა განაპირა მცველმა ამ დროში 179 მატჩის ჩატარება მოასწრო, გაიტანა 22 გოლი და 26 საგოლე გადაცემითაც გამოიჩინა თავი.
