მანჩესტერ სიტისა და ესპანეთის ეროვნული ნაკრების ფეხბურთელმა როდრიმ ბოლო ინტერიუში საკმაოდ ხმაურიანი განცხადება გააკეთა.
"კარიერის განმავლობაში ესპანეთის ფარგლებს გარეთ თამაშს არ ვგეგმავდი, მაგრამ 2019 წელს მანჩესტერ სიტის ვარიანტი გამოჩნდა და მეც დავთანხმდი. მანჩესტერ სიტისთან კონტრაქტი ერთ წელში მეწურება, რაც იმას ნიშნავს, რომ უახლოეს პერიოდში მოგვიწევს დავსხდეთ და მომავალზე ვისაუბროთ.
მინდა თუ არა ესპანეთში ისევ თამაში? რატომაც არა. რეალ მადრიდი? ატლეტიკო მადრიდში ადრე თამაში ხელს არ შემიშლის რეალ მადრიდში გადასვლაში. არიან სხვა მოთამაშეებიც, რომლებსაც ორივე გუნდში უთამაშიათ - შესაძლოა არა პირდაპირი ტრანსფერებით, მაგრამ მაინც.
მსოფლიოს ერთ-ერთი საუკეთესო კლუბისთვის უარის თქმა ნამდვილად არ შემიძლია. რეალ მადრიდი ყოველთვის რეალ მადრიდია - მათთვის კარი დახურული არ არის. ბერნაბეუზე თამაში წარმოუდგენელია."
რამდენიმე კვირის წინ როგორც გაცნობეთ, ფლორენტინო პერესს როდრის დამატება 2026 წლის ზაფხულში სურს. რაც შეეხება მანჩესტერ სიტის პოზიციას, "ქალაქელები" გამოცდილი ესპანელი ნახევარმცველის შენარჩუნებას შეეცდებიან და ძალიან მალე ახალ კონტრაქტსაც შესთავაზებენ.
ზაფხულის სატრანსფერო ფანჯრის მოახლოებასთან ერთად, როდრის თაობაზე უფრო მეტი ინფორმაცია გახდება ცნობილი.
