ლივერპული მორიგ დიდ ტრანსფერს უახლოვდება! არნე სლოტის გუნდი უახლოეს დღეებში ახალ ფორვარდს დაიმატებს — ბოლო მომენტში რაიმე გაუთვალისწინებელი თუ არ მოხდა, უგო ეკიტიკე აინტრახტიდან კარიერას მერსისაიდულ კლუბში გააგრძელებს. მხარეებს შორის წინასწარი სიტყვიერი შეთანხმება უკვე არსებობს, დარჩენილია მხოლოდ კლუბებს შორის სატრანსფერო თანხაზე შეთანხმება, რაც უბრალოდ დროის საკითხია.
23 წლის ფრანგ ფორვარდს ინგლისში მომდევნო კვირაში ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. ლივერპული ახალგაზრდა ფეხბურთელის სანაცვლოდ დაახლოებით €90 მილიონს გადაიხდის.
იმის მიუხედავად, რომ საქმეში სხვა ტოპ კლუბებიც იყვნენ, ლივერპულმა მოახერხა და ფრანგი ფეხბურთელის ტრანსფერი დახურა. განიხილებოდა ალექსანდერ ისაკის დამატებაც, თუმცა ნიუკასლმა ყველა შეთავაზება დაბლოკა, სწორედ ამიტომ, არნე სლოტის გუნდი გეგმა B-ზე გადაერთო. უგო ეკიტიკესთვის 6-წლიანი კონტრაქტი უკვე გამზადებულია.
უგო ეკიტიკე აინტრახტის ღირსებას 2024 წლიდან მოყოლებული იცავდა. ფეხბურთელმა ამ დროში 64 მატჩის ჩატარება მოასწრო, გაიტანა 26 გოლი და 14 საგოლე გადაცემითაც გამოიჩინა თავი.
