ტრანსფერი დროის საკითხია — ბოლო მომენტში რაიმე გაუთვალისწინებელი თუ არ მოხდა, ჯაკომო რასპადორი ნაპოლიდან კარიერას ატლეტიკო მადრიდში გააგრძელებს! დიახ, მხარეები გარიგების ბოლო დეტალებს უახლოეს საათებში მოაგვარებენ, რის შემდეგაც 25 წლის ფეხბურთელი ესპანეთში გაემგზავრება, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს. ატლეტიკო მადრიდი იტალიელი ფორვარდის სანაცვლოდ დაახლოებით €23-25 მილიონს გადაიხდის.
ჯაკომო რასპადორი, რომ ნაპოლის დატოვებას გეგმავდა, ამის შესახებ რამდენიმე თვის წინ გაცნობეთ. იტალიელი ანტონიო კონტეს გეგმებში არ შედიოდა, შესაბამისად, ფეხბურთელის "პარტენოპეიდან" წასვლა უბრალოდ დროის საკითხი იყო. საქმეში რამდენიმე კლუბი იყო, თუმცა სიტუაცია მას შემდეგ შეიცვალა, რაც ატლეტიკო მადრიდის ინტერესი დადასტურდა. ჯაკომო რასპადორიმ მადრიდულ კლუბს ტრანსფერზე თანხმობა ძალიან მარტივად განუცხადა და ტრანსფერიც დაიხურა.
იტალიელი ფორვარდი ნაპოლის ღირსებას 2022 წლიდან მოყოლებული იცავდა. ფეხბურთელმა ამ დროში 109 მატჩის ჩატარება მოასწრო, გაიტანა 18 გოლი და 10 საგოლე გადაცემითაც გამოიჩინა თავი.
