რეალ მადრიდში მომდევნო სეზონისთვის მზადებას უკვე შეუდგნენ. ფლორენტინო პერესი 2026 წლის ზაფხულში რამდენიმე ფეხბურთელის დამატებას გეგმავს, საიდანაც ერთ-ერთი აუცილებლად ცენტრალური მცველი იქნება. მეტიც, განიხილება ორი მცველის დამატებაც, შესაბამისად, სამეფო კლუბმა ამ საკითხზე მუშაობა უკვე დაიწყო.
როგორც ფრანგული მედია იუწყება, რეალ მადრიდი ორი ფრანგი მცველით ინტერესდება — საუბარია იბრაჰიმა კონატესა და დაიო უპამეკანოზე. ჩაბი ალონსოს ორივე ფეხბურთელი ძალიან მოსწონს, თუმცა იმის მიუხედავად, რომ ორივე მათგანი სეზონის ბოლოს თავისუფალი აგენტი ხდება, დიდი შანსია მხოლოდ ერთი მოთამაშის დამატება მოხერხდეს.
ბოლო საათებში გავრცელებული ინფორმაციის თანახმად, რეალ მადრიდში ფავორიტი უკვე ჰყავთ და ეს დაიო უპამეკანოა, მეტიც, თუ ფრანგულ წყაროებს დავუჯერებთ, მხარეებს შორის წინასწარი სიტყვიერი შეთანხმებაც კი არსებობს, თუმცა ეს რა თქმა უნდა იმას არ ნიშნავს, რომ ტრანსფერი აუცილებლად განხორციელდება. ბაიერნი 27 წლის მცველის შენარჩუნებაზე ამ დრომდე მუშაობს და ფეხბურთელის ასე მარტივად გაშვებას არ გეგმავს.
უახლოეს თვეებში როგორც დაიო უპამეკანოს, ისე იბრაჰიმა კონატეს თაობაზე უფრო მეტი ინფორმაცია გახდება ცნობილი, თუმცა ერთი რამ ფაქტია, როცა საქმე თავისუფალ აგენტებს ეხება, იქ რეალ მადრიდი უკონკურენტოა.
