როგორც რამდენიმე დღის წინ უკვე მოგახსენეთ, ბაიერნი ზაფხულში კიმ მინ-ჯეს გაყიდვას შეეცდება. "რეკორდმაისტერი" 28 წლის ცენტრალური მცველის სანაცვლოდ ყველა შეთავაზებას განიხილავს და როგორც ცნობილი ხდება, სამხრეთ კორეელი ფეხბურთელით რამდენიმე კლუბი უკვე ინტერესდება.
იუვენტუსი, ნიუკასლი, მანჩესტერ იუნაიტედი და ჩელსი — დიახ, ოთხივე კლუბის ინტერესი რეალური და დადასტურებულია. კიმ მინ-ჯეს წარმომადგენლებთან პირველი კონტაქტი უკვე შედგა, თუმცა ამ მომენტისთვის მეტი არაფერი ხდება. როგორც ირკვევა, თავად ფეხბურთელიც სერიოზულად განიხილავს ახალ კლუბში გადასვლას, რაც მიუნხენურ გრანდს ბევრად უადვილებს საქმეს.
ზაფხულის სატრანსფერო ფანჯრის მოახლოებასთან ერთად მოსალოდნელია სხვა კლუბების გააქტიურებაც. ბაიერნი 28 წლის მცველს დაახლოებით €35-40 მილიონად აფასებს. ვენსან კომპანის ახალი ცენტრალური მცველის დამატება სურს, შესაბამისად, კიმის გაყიდვა კლუბისთვის პრიორიტეტულია.
