ტოპ ლიგებში ზაფხულის სატრანსფერო ფანჯარა 11 დღეში იხურება, რაც იმას ნიშნავს, რომ უახლოეს დღეებში საინტერესო გარიგებების მოლოდინში ვართ.
ამ სტატიაში ლიონის ფინანსურ პრობლემებს კიდევ ერთხელ გავიხსენებთ და ამის ფონზე გეტყვით, რომ კლუბში საკმაოდ რთული გადაწყვეტილება მიიღეს — ლიონის ხელმძღვანელობამ გუნდის ერთ-ერთი ლიდერი მალიკ ფოფანა ტრანსფერზე დააყენა! დიახ, გადაწყვეტილება საბოლოოა და როგორც ჩენთვისაა ცნობილი, ფრანგული კლუბი 20 წლის ვინგერის სანაცვლოდ ყველა შეთავაზებას განიხილავს. ეს გადაწყვეტილება თავიდან ბოლომდე ფინანსური პრობლემებით არის გამოწვეული. იმის მიუხედავად, რომ პაულუ ფონსეკას ბელგიელი ფეხბურთელის შენარჩუნება სურდა, ლიონმა მალიკ ფოფანას გაყიდვა მაინც გადაწყვიტა. ფრანგები ახალგაზრდა შემტევს დაახლოებით €35-40 მილიონად აფასებენ.
ზემოხსენებული გადაწყვეტილება ერთ რამეს ნიშნავს — გიორგი მიქაუტაძე ლიონში რჩება! ბოლო მომენტში რაიმე გაუთვალისწინებელი თუ არ მოხდა, 24 წლის ქართველი ფორვარდი 2025/26 სეზონს მის საყვარელ კლუბში გაატარებს. ლიონში ფიქრობენ, რომ მალიკ ფოფანას გაყიდვა ფინანსურ სიტუაციას გარკვეულწილად გამოასწორებს, შესაბამისად, გიორგი მიქაუტაძის გასხვისება საჭირო აღარ იქნება. უახლოეს დღეებში ბელგიელი ვინგერის თაობაზე უფრო მეტი ინფორმაცია გახდება ცნობილი. მალიკ ფოფანას მიმართ ინტერესს საკმაოდ ბევრი კლუბი იჩენს.
