ლიონის ფინანსური პრობლემების ფონზე, რაიან შერკი ნამდვილად არ იქნება ბოლო ფეხბურთელი, რომელიც მიმდინარე ზაფხულის სატრანსფერო ფანჯრის დროს ფრანგულ კლუბს დატოვებს. წამსვლელთა სიაში დაახლოებით 6-7 ფეხბურთელია, შესაბამისად, ლიონის არსებული შემადგენლობა მომდევნო სეზონის სტარტზე საგრძნობლად შეცვლილი იქნება.
შემდეგი ფეხბურთელი, რომელიც დიდი ალბათობით ლიონს დატოვებს მალიკ ფოფანაა. გავრცელებული ინფორმაციის თანახმად, 20 წლის ბელგიელი ვინგერის ტრანსფერზე ჩელსი მუშაობს! მას შემდეგ, რაც ლონდონურმა კლუბმა დორტმუნდიდან ჯეიმი გიტენსის დამატება ვერ მოახერხა, სტემფორდ ბრიჯის ბინადრები თავიდან ბოლომდე მალიკ ფოფანას კანდიდატურაზე გადაერთვნენ. კლუბებს შორის პირველი კონტაქტი უკვე შედგა, სადაც მთავარი სასაუბრო თემა ბელგიელის პოტენციური ტრანსფერი იყო.
ლიონი ახალგაზრდა გარემარბს დაახლოებით €50 მილიონად აფასებს. მალიკ ფოფანას ჩელსის ვარიანტი ძალიან მოსწონს, შესაბამისად, უახლოეს პერიოდში ამ პოტენციურ გარიგებასთან დაკავშირებით უფრო მეტი ინფორმაცია გახდება ცნობილი. ჩელსი მიხაილო მუდრიკის შემცვლელის ძიებაშია.
