ლივერპულში ტრენტ ალექსანდერ-არნოლდის ისტორია დასრულდა, მის შემცვლელს კი კლუბი უკვე ეძებს. განიხილება რამდენიმე კანდიდატურა, თუმცა ბრიტანულ მედიას თუ დავუჯერებთ, მთავარი სამიზნე უკვე ცნობილია — ჟერემი ფრიმპონგი არნე სლოტის რჩეულია! დიახ, ნიდერლანდელ სპეციალისტს თანამემამულე ძალიან მოსწონს და მისი აზრით, 24 წლის ფეხბურთელი ტრენტს იდეალურად შეცვლის.
ჟერემი ფრიმპონგი, რომ სეზონის ბოლოს ლევერკუზენის დატოვებას გეგმავდა, ამის შესახებ რამდენიმე თვის წინ უკვე გაცნობეთ. ფეხბურთელი თვლის, რომ მისი კარიერის განვითარებისთვის გერმანული კლუბის დატოვება სწორი ნაბიჯი იქნება. შეგახსენებთ, 24 წლის ფეხბურთელს კონტრაქტში გამოსასყიდი თანხა €35 მილიონი უწერია, რაც ასეთი დონის ფეხბურთელისთვის საკმაოდ დაბალი თანხაა.
ნიდერლანდელის მიმართ სხვა კლუბების ინტერესიც დადასტურდა, თუმცა როგორც ჩანს ფავორიტი მაინც ლივერპულია. უახლოეს კვირებში, მერსისაიდელები საბოლოო გადაწყვეტილებას მიიღებენ, რა დროსაც გაირკვევა ენფილდის ბინადრები ჟერემი ფრიმპონგის გამოსასყიდ თანხას გადაიხდიან თუ არა. როგორც ირკვევა, განიხილება სხვა ვარიანტებიც.
ნიდერლანდელი ფეხბურთელი ლევერკუზენის ღირსებას 2021 წლიდან მოყოლებული იცავს. ფეხბურთელმა ამ დროში 189 მატჩის ჩატარება მოასწრო, გაიტანა 29 გოლი და 44 საგოლე გადაცემითაც გამოიჩინა თავი
