ტრანსფერი დაიხურა — ლუკას პაკეტა ვესტ ჰემიდან კარიერას ფლამენგოში გააგრძელებს! მხარეებმა გარიგების ყველა დეტალი შეათანხმეს, 28 წლის ფეხბურთელს სამშობლოში უკვე ელოდებიან, სადაც სამედიცინო შემოწმებას გაივლის და კონტრაქტს ხელს მოაწერს. ფლამენგო ლუკას პაკეტას სანაცვლოდ €41.25 მილიონს გადაიხდის.
ლუკას პაკეტას, რომ ვესტ ჰემის დატოვება სურდა, ამის შესახებ ბრიტანული პრესა რამდენიმე თვის განმავლობაში წერდა. 2025 წლის ზაფხულში განიხილებოდა ასტონ ვილაში ტრანსფერიც, თუმცა გარიგება არ შედგა და ბრაზილიელი მაშინ ლონდონში დარჩა. შემდეგ გამოჩნდა ფლამენგოს ვარიანტი, სადაც ლუკას პაკეტა 2016-2019 წლებში თამაშობდა, შესაბამისად, ფეხბურთელმა ამ შეთავაზებაზე თანხმობა მარტივად განაცხადა.
ლუკას პაკეტა ვესტ ჰემის ღირსებას 2022 წლიდან მოყოლებული იცავდა. ბრაზილიელმა ამ დროში 139 მატჩის ჩატარება მოასწრო, გაიტანა 23 გოლი და 15 საგოლე გადაცემითაც გამოიჩინა თავი.
