მანჩესტერ იუნაიტედში ახალი სეზონისთვის მზადებას უკვე შეუდგნენ — ზაფხულში"წითელ ეშმაკებს" ბევრი ფეხბურთელი დატოვებს, რაც იმას ნიშნავს, რომ რუბენ ამორიმის გუნდს საკმაოდ დატვირთული სატრანსფერო ფანჯარა ექნება.
როგორც ირკვევა, მანჩესტერ იუნაიტედი მინიმუმ ერთ ფორვარდს აუცილებლად დაიმატებს და რამდენიმე წუთის წინ გავრცელებული ინფორმაციის თანახმად, #1 სამიზნე მატეუს კუნია იქნება!
მანჩესტერ იუნაიტედის უფროსობა ბრაზილიელ ფორვარდთან მოლაპარაკებებს უკვე რამდენიმე კვირაა აწარმოებს და კლუბში სჯერათ, რომ ეს გარიგება აუცილებლად დაიხურება. საქმეში არიან სხვა ტოპ კლუბებიც, თუმცა ოლდ ტრაფორდის ბინადრები 25 წლის ფეხბურთელის კონტრაქტში ჩაწერილი გამოსასყიდი თანხის გააქტიურებას უკვე გეგმავენ, რაც მათ გარკვეულ უპირატესობას მისცემს. შეგახსენებთ, ბრაზილიელ ფორვარდს კონტრაქტში გამოსასყიდი თანხა £62.5 მილიონი უწერია. თუ ყველაფერი გეგმის მიხედვით წავა, დიდი შანსია მატეუს კუნია მანჩესტერ იუნაიტედისთვის 2025/26 სეზონის პირველი ტრანსფერი გახდეს.
მატეუს კუნია ვულვზის ღირსებას 2023 წლიდან მოყოლებული იცავს. ბრაზილიელმა ამ დროში 87 მატჩის ჩატარება მოასწრო, გაიტანა 32 გოლი და 13 საგოლე გადაცემითაც გამოიჩინა თავი. ბრაზილიელი სეზონის ბოლოს "მგლებს" 100% დატოვებს.
