მანჩესტერ იუნაიტედში ახალი სეზონისთვის მზადებას აქტიურად აგრძელებენ. კლუბმა მატეუს კუნია და ბრაიან მბიუმოს ტრანსფერები უკვე დახურა, თუმცა რუბენ ამორიმის გუნდი ამაზე გაჩერებას არ აპირებს. "წითელი ეშმაკები" სატრანსფერო ფანჯრის დახურვამდე მინიმუმ 3-4 ფეხბურთელს კიდევ დაიმატებენ. გავრცელებული ინფორმაციის თანახმად, პორტუაგიელი სპეციალისტისთვის ერთ-ერთი პრიორიტეტი ახალი ფორვარდის შეძენა იქნება.
რასმუს ჰოილუნი რუბენ ამორიმის გეგმებში არ შედის და კლუბი მის გაყიდვაზე უკვე მუშაობს. რაც შეეხება ჯოშუა ზირკზეს, ნიდერლანდელი გუნდში დარჩება, თუმცა ამის მიუხედავად, მანჩესტერ იუნაიტედი ახალ ფორვარდს მაინც დაიმატებს.
როგორც ირკვევა, ოლდ ტრაფორდის ბინადრები შეტევის გასაძლიერებლად 3 კანდიდატურას განიხილავენ: ბენჟამინ შეშკო (ლაიფციგი), ოლი უოტკინსი (ასტონ ვილა) და ნიკოლას ჯექსონი (ჩელსი). კლუბი სამივე ფეხბურთელის აგენტთან მუდმივ კონტაქტზეა, შესაბამისად, უახლოეს პერიოდში მოსალოდნელია, რომ რომელიმე მათგანის თაობაზე პირველი ოფიციალური შეთავაზება გაკეთდება.
მანჩესტერ იუნაიტედში ახალი ფორვარდის დამატებას ჯერ არ ჩქარობენ, რადგან კლუბი ახლა გაყიდვებზეა კონცენტრირებული. გარნაჩოს, ანტონისა და სხვა ფეხბურთელების გაყიდვის შემდეგ, ამორიმის გუნდი ახალ ფორვარდს დაიმატებს. ზემოხსენებული ფეხბურთელების გარდა, კლუბი სხვა ფორვარდებსაც ყურადღებით აკვირდება.
