"წითელი ეშმაკები" 27 წლის შემტევის გაყიდვას იანვარშივე შეეცდებიან, რაც იმას ნიშნავს, რომ გუნდი მის შემცვლელს უკვე ეძებს. როგორც ინგლისური პრესა იუწყება, ოლდ ტრაფორდის ბინადრები ინგლისელი ფეხბურთელის შემცვლელად 4 ვინგერს განიხილავენ.
ხვიჩა კვარაცხელია, კაორუ მიტომა, ნიკო უილიამსი და ლეროი ზანე — მანჩესტერ იუნაიტედი ამ ფეხბურთელებს ყურადღებით აკვირდება. კლუბში ფიქრობენ, რომ ამ სიიდან ნებისმიერი ფეხბურთელი მარკუს რაშფორდს იდეალურად ჩაანაცვლებს.
ამ ოთხეულიდან ყველაზე ძვირადღირებული, რა თქმა უნდა ხვიჩა, კვარაცხელიაა. ნაპოლი ქართველ ვინგერს მინიმუმ €100 მილიონად აფასებს. შემდეგი სიაში კაორუ მიტომაა, რომლის სატრანსფერო ღირებულება დაახლოებით €60-70 მილიონია, ხოლო რაც შეეხება ნიკო უილიამსს, ესპანელ ფეხბურთელს კონტრაქტში გამოსასყიდი თანხა €58 მილიონი უწერია. სიაში ბოლო ფეხბურთელი ლეროი ზანეა, რომელიც სეზონის ბოლოს თავისუფალი აგენტი ხდება.
ზამთრის სატრანსფერო ფანჯრის გახსნამდე სულ რაღაც 6 დღეა დარჩენილი, რაც იმას ნიშნავს, რომ უახლოეს დღეებში მარკუს რაშფორდის თაობაზე უფრო მეტ ინფორმაციას შევიტყობთ.
