მანჩესტერ სიტიში ახალი სეზონისთვის მზადება დაიწყეს — უკვე ცნობილია რომელი ფეხბურთელები აღარ შედიან პეპ გვარდიოლას გეგმებში და ვინ დატოვებს ზაფხულში კლუბს, თუმცა ახლა მათზე არ ვისაუბრებთ, არამედ სიტის ერთ-ერთი მთავარი სამიზნის შესახებ მოგიყვებით.
როგორც წინა კვირებში მოგახსენეთ, მანჩესტერ სიტი კევინ დე ბრუინის შემცვლელს უკვე ეძებს. განიხილება რამდენიმე კანდიდატურა, კერძოდ ფლორიან ვირცი, მორგან გიბს-უაითი და ტიჯანი რეინდერსი, თუმცა როგორც ახლა ხდება ცნობილი, "ქალაქელები" დანი ოლმოს ვარიანტსაც სერიოზულად განიხილავენ. პეპ გვარდიოლას ესპანელი უნივერსალი ძალიან მოსწონს, თუმცა 27 წლის ფეხბურთელის დამატება მარტივი არ იქნება.
როგორც ცნობილია, დანი ოლმოს ბარსელონას დატოვება არ სურს, თუმცა თუ კატალონიური კლუბის ფინანსურ პრობლემებს გავითვალისწინებთ, ზაფხულში ესპანელი ფეხბურთელის სხვა გუნდში ტრანსფერი წარმოუდგენელი სულაც არ იქნება. დანი ოლმოს სატრანსფერო ფასი მინიმუმ €80 მილიონია და ამ მომენტისთვის უცნობია, აპირებს თუ არა მანჩესტერ სიტი ამ თანხის გადახდას.
როგორც ჩანს, ზაფხულში მანჩესტერ სიტი დიდ აქტიურობას გეგმავს, სატრანსფერო ფანჯრის მოახლოებასთან ერთად კი ეტიჰადის ბინადრების პოტენციურ სამიზნეებთან დაკავშირებით უფრო მეტი ინფორმაცია გახდება ცნობილი.
