მანჩესტერ სიტიში ახალი სეზონისთვის მზადება დაიწყეს — უკვე ცნობილია რომელი ფეხბურთელები აღარ შედიან პეპ გვარდიოლას გეგმებში და ვინ დატოვებს ზაფხულში კლუბს, თუმცა ახლა მათზე არ ვისაუბრებთ, არამედ სიტის ერთ-ერთი მთავარი სამიზნის შესახებ მოგიყვებით.
როგორც წინა კვირებში მოგახსენეთ, მანჩესტერ სიტი კევინ დე ბრუინის შემცვლელს უკვე ეძებს. განიხილება ორი მთავარი კანდიდატურა, კერძოდ ფლორიან ვირცი და მორგან გიბს-უაითი, თუმცა როგორც ახლა ხდება ცნობილი, "ქალაქელები" დეზირე დუეს ვარიანტსაც სერიოზულად განიხილავენ. პეპ გვარდიოლას ახალგაზრდა ფრანგი უნივერსალი ძალიან მოსწონს, თუმცა 19 წლის ფეხბურთელის დამატება მარტივი არ იქნება.
როგორც ჩვენთვის არის ცნობილი, პსჟ-ს ფეხბურთელის გაყიდვა არ სურს, რაც შეეხება თავად დუეს პოზიციას, არც თავად ფეხბურთელი განიხილავს ზაფხულში გუნდის გამოცვლას. 19 წლის ნახევარმცველს პარიზულ კლუბთან არსებული კონტრაქტი 2029 წლამდე აკავშირებს, შესაბამისად, მისი სატრანსფერო ფასი მინიმუმ €80 მილიონია.
როგორც ჩანს, ზაფხულში მანჩესტერ სიტი დიდ აქტიურობას გეგმავს, სატრანსფერო ფანჯრის მოახლოებასთან ერთად კი ეტიჰადის ბინადრების პოტენციურ სამიზნეებთან დაკავშირებით უფრო მეტი ინფორმაცია გახდება ცნობილი.
