რამდენიმეკვირიანი მოლაპარაკებები საბოლოო შეთანხმებით დასრულდა, მარკ-ანდრე ტერ შტეგენი ბარსელონადან კარიერას ჟირონაში გააგრძელებს! მხარეებს შორის წინასწარი სიტყვიერი შეთანხმება რამდენიმე წუთის წინ შედგა, გამოცდილ გერმანელ მეკარეს კი ახალ კლუბში უკვე ელოდებიან, სადაც სამედიცინო შემოწმებას გაივლის და კონტრაქტს ხელს მოაწერს. ჟირონა მარკ-ანდრე ტერ შტეგენს 6-თვიანი მშრალი იჯარით დაიმატებს.
მარკ-ანდრე ტერ შტეგენი, რომ ჰანსი ფლიკის გეგმებში არ შედიოდა, ამის შესახებ ყველამ კარგად იცოდა, შესაბამისად, ბარსელონა გამოცდილი მეკარის გასხვისებას რამდენიმე თვის განმავლობაში ცდილობდა. იმის მიუხედავად, რომ 33 წლის კარის დარაჯს "ბლაუგრანას" დატოვება არ სურდა, საბოლოო ჯამში ჟირონაში ტრანსფერს მაინც დათანხმდა.
ბოლო მომენტში რაიმე გაუთვალისწინებელი თუ არ მოხდა, ჟირონა მარკ-ანდრე ტერ შტეგენს ტრანსფერს მიმდინარე კვირაში ოფიციალურად დაადასტურებს.
