კეისუკე ჰონდას თავგადასავლების გარეშე არ შეუძლია. ვეტერანმა შემტევმა ნახევარმცველმა 38 წლის ასაკში განაახლა კარიერა და ბუტანურ პაროს შეუერთდა. ყველაზე საინტერესო არის ის, რომ იაპონელი გამთამაშებელი "ვეფხვების" შემადგენლობაში ჩაატარებს მხოლოდ 1 მატჩს, მაგრამ ეს თამაში კლუბისთვის განსაკუთრებული იქნება.
საქმე ისაა, რომ აზიურ გუნდს სჭირდება ჩელენჯ ლიგაში გასვლა, ეს არის ტურნირი, რომელიც ევროპულ კონფერენს ლიგას ჰგავს. მოწინააღმდეგე არის ნეპალური ჩერჩ ბოის იუნაიტედი, მატჩი 13 აგვისტოს გაიმართება. მილანის ყოფილ გამთამაშებელს ფეხბურთი არ უთამაშია 1000-ზე მეტი დღის მანძილზე და მისმა კარიერამ ძირითადად მოგზაურობაში ჩაიარა.
38 წლის შემტევ ნახევარმცველს მშობლიური იაპონიის გარდა, სხვადასხვა დროს უთამაშია ნიდერლანდებში, რუსეთში, იტალიაში, მექსიკაში, ავსტრალიაში, ბრაზილიაში, პორტუგალიაში, აზერბაიჯანში, ლიეტუვაში, ახლა კი ბუტანში. ჰონდას კარიერის მწვერვალი იყო "როსონერი", რომლის შემადგენლობაში მან 2014-2017 წლებში ჩაატარა 92 მატჩი და გაიტანა 11 ბურთი.
ბოლოს კიდევ ერთი საინტერესო ფაქტი - 2018-2023 წლებში იაპონელი შემტევი ნახევარმცველი მწვრთნელადაც მუშაობდა. ის სათავეში ედგა კამბოჯის მთავარ და 23-წლამდელთა გუნდს.
