მიკელ მერინო არსენალში: მხარეები ტრანსფერის ბოლო დეტალებს აგვარებენ

არსენალი ახალი სეზონისთვის მზადებას აქტიურად აგრძელებს. არტეტას გუნდს უკვე შეუერთდა რიკარდო კალაფიორი, რომელიც ზაფხულის სატრანსფერო ფანჯარაზე პირველი შენაძენი იყო, თუმცა "მეთოფეები" ამაზე გაჩერებას არ აპირებენ — სულ რამდენიმე წუთის წინ გავრცელებული ინფორმაციის თანახმად, არსენალი ახლოს არის მიკელ მერინოს დამატებასთან. ინგლისური კლუბი და რეალ სოსიედადი ტრანსფერის ბოლო დეტალებს აგვარებენ, ფეხბურთელი კი მზად არის ახალ გუნდს ამერიკის შეერთებულ შტატებში პრესეზონზე შეუერთდეს.

საუბარია €30 მილიონიან გარიგებაზე, ფეხბურთელისთვის კი გრძელვადიანი კონტრაქტი გამზადებულია. მხარეებს შორის წინასწარი სიტყვიერი შეთანხმება უკვე არსებობს და როგორც ფეხბურთელთან დაახლოებული წყაროები ამბობენ, ტრანსფერი დროის ამბავია. არტეტა ახალ ნახევარმცველს ეძებდა და როგორც ჩანს მერინო მისი რჩეულია!

28 წლის ესპანელ შუახაზელს, პრემიერ ლიგაში თამაშის გამოცდილება უკვე აქვს. ფეხბურთელი 2017/18 სეზონში ნიუკასლის ღირსებას იცავდა, 6 წლის შემდეგ კი ინგლისში ევროპის ჩემპიონის სტატუსით ბრუნდება.