მილანში ახალი სეზონისთვის მზადებას აქტიურად აგრძელებენ. პიეტრო ტერაჩანოს, პერვის ესტუპინიანის, ლუკა მოდრიჩის, სამუელე რიჩისა და არდონ იაშარის შემდეგ, მასიმილიანო ალეგრის გუნდი კიდევ 2-3 ფეხბურთელის დამატებას გეგმავს.
"როსონერისთვის" ერთ-ერთი მთავარი პრიორიტეტი ახალი ფორვარდის შეძენაა და როგორც ჩვენთვის ხდება ცნობილი, განიხილება ორი მთავარი კანდიდატურა.
ბოლო საათებში გავრცელებული ინფორმაციის თანახმად, მილანმა რასმუს ჰოილუნის ტრანსფერზე მუშაობა აქტიურად დაიწყო. კლუბის სპორტული დირექტორი იგლი ტარე როგორც ფეხბურთელის აგენტთან, ისე მანჩესტერ იუნაიტედთანაც მუდმივ კონტაქტზეა.
როგორც ირკვევა, "წითელი ეშმაკები" მზად არიან დანიელი ფორვარდი იჯარის წესით გაუშვან, რაც მილანისთვის იდეალური გარიგება იქნება, თუმცა, ამ მომენტისთვის 22 წლის ფეხბურთელს ოლდ ტრაფორდის დატოვება არ სურს. იმის მიუხედავად, რომ რასმუს ჰოილუნი რუბენ ამორიმის გეგმებში არ შედის, ფეხბურთელი ყველაფერს აკეთებს იუნაიტედში დასარჩენად.
დანიელის გარშემო სიტუაცია შეიძლება უახლოეს დღეებში შეიცვალოს, რადგან მანჩესტერი უახლოეს საათებში ბენჟამინ შეშკოს ოფიციალურად წარადგენს, რაც რასმუს ჰოილუნს ავტომატურად როტაციის ფეხბურთელად აქცევს. ახალგაზრდა ფეხბურთელის პოტენციურ ტრანსფერთან დაკავშირებით უფრო მეტი ინფორმაცია მომდევნო კვირაში გახდება ცნობილი.
მეორე ფორვარდი, რომლის დამატებასაც მილანში განიხილავენ დუშან ვლაჰოვიჩია. სერბი ფეხბურთელი, რომ "როსონერის" სამიზნე იყო, ამის შესახებ რამდენიმე კვირის წინ გაცნობეთ. მასიმილიანო ალეგრის 25 წლის ფორვარდთან მუშაობა კიდევ ერთხელ სურს, თუმცა, სერბის დამატება მილანისთვის მარტივი არ იქნება.
დუშან ვლაჰოვიჩზე როდესაც ვსაუბრობთ, აქ ორ პრობლემას ვხვდებით: პირველი იუვენტუსის მიერ მოთხოვნილი თანხაა, ხოლო მეორე ფეხბურთელის წლიური ანაზღაურება.
იმის მიუხედავად, რომ სერბი ფორვარდი მომავალ წელს თავისუფალი აგენტი ხდება, იუვენტუსი ფეხბურთელს დაახლოებით €25-30 მილიონად აფასებს. ხოლო რაც შეეხება ვლაჰოვიჩის წლიურ ანაზღაურებას, მისი ხელფასი არც მეტი, არც ნაკლები €12 მილიონია, რაც არა მხოლოდ მილანისთვის, არამედ სხვა ყველა დაინტერესები კლუბისთვის დიდ პრობლემას წარმოადგენს. სიტუაცია შეიძლება სატრანსფერო ფანჯრის ბოლოსკენ შეიცვალოს, და როგორც იუვენტუსი, ისე ვლაჰოვიჩიც გარკვეულ დათმობაზე წავიდეს.
მილანში უახლოეს დღეებში საბოლოო გადაწყვეტილებას მიიღებენ. მაქს ალეგრის გუნდი ახალ ფორვარდს 100% დაიმატებს და დიდი ალბათობით ეს რასმუს ჰოილუნი ან დუშან ვლაჰოვიჩი იქნება.
