იმის მიუხედავად, რომ მიმდინარე სეზონის დასრულებამდე ჯერ კიდევ დიდი დროა დარჩენილი, ზაფხულის პოტენციურ დიდ ტრანსფერებზე საუბარი უკვე შეგვიძლია. მუნდიალის წელს დიდი შანსია რამდენიმე ტოპ გარიგება განხორციელდეს, შესაბამისად, წინ საინტერესო სატრანსფერო ფანჯარა გველოდება.
ამ სტატიაში მილანის გეგმების შესახებ მოგიყვებით, რომელიც ზაფხულში 5-6 ახალი ფეხბურთელის დამატებას აპირებს, საიდანაც ერთ-ერთი აუცილებლად ფორვარდი იქნება.
ფორვარდის პოზიციაზე რამდენიმე კანდიდატურა განიხილება, თუმცა გავლენიან იტალიურ გამოცემებს თუ დავუჯერებთ, მაქს ალეგრის ორი ფავორიტი ჰყავს — დუშან ვლაჰოვიჩი და მოიზე კინი! დიახ, გამოცდილ სპეციალისტს როგორც სერბი, ისე იტალიელი ფორვარდიც ძალიან მოსწონს, თანაც ამ ყველაფერს ისიც ემატება, რომ ორივე მათგანთან მუშაობის გამოცდილება აქვს.
შეგახსენებთ, დუშან ვლაჰოვიჩი სეზონის ბოლოს თავისუფალი აგენტი ხდება, შესაბამისად, მისი დამატება ყველა გუნდს სრულიად უფასოდ შეეძლება. რაც შეეხება მოიზე კინს, იტალიელი ფორვარდის კონტრაქტში გამოსასყიდი თანხა €62 მილიონი წერია, თუმცა მოსალოდნელია, რომ ზაფხულში მისი ფასი შედარებით დაიკლებს.
იტალიური პრესა მილანს გაბრიელ ჟეზუსსაც უკავშირებს, რომლის აგენტიც მაქს ალეგრის წარმომადგენელიცაა. 28 წლის ბრაზილიელმა ფეხბურთელმა დიდი შანსია ზაფხულში არსენალი დატოვოს, შესაბამისად, ზაფხულში მის მიმართ ინტერესი საგრძნობლად გაიზრდება.
მილანში სხვა ფორვარდებსაც ყურადღებით აკვირდებიან, რაც იმას ნიშნავს, რომ ზაფხულის სატრანსფერო ფანჯრის მოახლოებასთან ერთად უფრო მეტი ინფორმაცია გახდება ცნობილი.
