გავლენიანი ფრანგული გამოცემები უსმან დემბელეს შესახებ საკმაოდ საინტერესო ინფორმაციას ავრცელებენ — როგორც ცნობილი ხდება, პარი სენ-ჟერმენმა და ფრანგი ვინგერის აგენტმა ახალ კონტრაქტზე მოლაპარაკებები დროებით შეაჩერეს და სეზონის ბოლომდე მოცდა არჩიეს. ამის ერთ-ერთი მიზეზი ისაა, რომ პარი სენ-ჟერმენს წინ უმნიშვნელოვანესი მატჩები ელოდება და ასეთ დროს ახალ ხელშეკრულებაზე საუბარი მიზანშეწონილი არ იქნებოდა.
პარიზული კლუბი და 28 წლის ფეხბურთელის აგენტი ახალ კონტრაქტზე უკვე რამდენიმე თვეა მუშაობენ, თუმცა როგორც ხედავთ შეთანხმებას ამ დრომდე ვერ ახერხებენ. უსმან დემბელეს პარი სენ-ჟერმენთან არსებული კონტრაქტი 2028 წლამდე აკავშირებს, მისი წლიური ანაზღაურება კი დაახლოებით €18 მილიონია.
ზემოხსენებული წყაროების ინფორმაციით არის პატარა შანსი, რომ პარი სენ-ჟერმენმა ახალ კონტრაქტზე მოლაპარაკებები სეზონის დასრულების შემდეგაც არ განაახლოს, რადგან კლუბში ფიქრობენ, რომ საჩქარო არაფერია და 2028 წლამდე საკმაოდ დიდი დროა. 2026 წლის მუნდიალის დასრულების შემდეგ, უსმან დემბელეს თაობაზე უფრო მეტი ინფორმაცია გახდება ცნობილი.
