გუნდმა ახალი შემტევის დამატება მას შემდეგ გადაწყვიტა, რაც სიტიმ პირველი წრე ჩააგდო. გუარდიოლა ეძებს ისეთ ფეხბურთელს, რომელიც შეტევაში გოლების გატანის გარდა, საგოლე გადაცემებსაც შეასრულებს და რამდენიმე პოზიციას დაფარავს. სწორედ ასეთი ფეხბურთელია ომარ მარმუში, რომელიც სიტისთვის #1 სამიზნეა. ეგვიპტელ ფეხბურთელზე ბოლო ორი სეზონია მთელი ევროპა ალაპარაკდა. აინტრახტის უდავო ლიდერი, რომელიც გამზადებულია ტოპ კლუბისთვის.
მხარეებს შორის პირველი კონტაქტი უკვე შედგა. 25 წლის ფორვარდმა სიტის ტრანსფერზე თანხმობა უკვე განუცხადა, ინგლისელები კი პირველ ოფიციალურ შეთავაზებას ამზადებენ. პეპ გუარდიოლა მოლოდინის რეჟიმშია, ესპანელი გუნდში ახალ შემტევს ელოდება.
ომარ მარმუში აინტრახტის ღირსებას 2023 წლიდან მოყოლებული იცავს, რა დროშიც ფეხბურთელმა 65 მატჩის ჩატარება მოასწრო, გაიტანა 35 გოლი და 18 საგოლე გადაცემითაც გამოიჩინა თავი. ფეხბურთელის დამატებას ლივერპული და ბაიერნიც განიხილავდნენ, თუმცა არა ზამთრის სატრანსფერო ფანჯრის დროს.
მანჩესტერ სიტი დაცვის გაძლიერებასაც გეგმავს და ფეხბურთელი, რომელიც დიდი ალბათობით კარიერას ეტიჰად სთედიუმზე გააგრძელებს, 20 წლის აბდუკოდირ ხუსანოვია! ახალგაზრდა უზბეკი ფეხბურთელი ფრანგული ლანსის ღირსებას იცავს და ამ სეზონში ნაჩვენები პერფორმანსით, მთელი ევროპა აალაპარაკა.
ლიგა 1-ის ბინადარმა ახალგაზრდა ცენტრალური მცველის ტრანსფერი 2023 წლის ზაფხულში დახურა, როდესაც ხუსანოვი ბელარუსიიდან, კერძოდ ენერგეტიკ-ბგუ მინსკიდან, სულ რაღაც €100.000-ად შეიძინა. ფეხბურთელი ამ სეზონში ლანსის შეუცვლელი წევრი გახდა და ბევრის აზრით, ლიგა 1-ის პირველი წრის საუკეთესო მცველიც სწორედ ისაა.
20 წლის ფეხბურთელით სხვა ევროპული გრანდებიც ინტერესდებიან. საქმეშია რეალ მადრიდიც, მაგრამ მანჩესტერ სიტის ტრანსფერის დახურვა იანვარიშვე სურს. ინგლისელები უახლოეს დღეებში პირველ ოფიციალურ შეთავაზებას გააკეთებენ. ფეხბურთელისთვის პირადი კონტრაქტი უკვე გამზადებულია.
მანჩესტერ სიტი მეორე წრისთვის სერიოზულად ემზადება. ჩავარდნილი ნოემბერ-დეკემბრის შემდეგ, პეპ გუარდიოლა დიდ დაბრუნებას აანონსებს.
