ნაპოლიში ზამთრის სატრანსფერო ფანჯარაზე ფიქრი უკვე დაიწყეს. იმის ფონზე, რომ გუნდმა ნახევარდაცვის ლიდერი კევინ დე ბრუინი 4-5 თვით დაკარგა, ანტონიო კონტემ იანვარში ახალი ნახევარმცველის დამატება მოითხოვა. საუბარია მინიმუმ ერთ ახალ შუახაზელზე, რადგან მძიმე დაზიანება მიიღო ანდრე-ფრანკ ზამბო ანგისამაც, შესაბამისად, დიდი შანსია იტალიურმა კლუბმა ორი ახალი ფეხბურთელი დაიმატოს.
"პარტენოპეიში" რამდენიმე ფეხბურთელის თაობაზე ინფორმაცია უკვე მოითხოვეს და როგორც ირკვევა სიაში 4 მოთამაშეა: კობი მეინუ (მანჩესტერ იუნაიტედი), ლორენცო პელეგრინი (რომა), არტურ ატა (უდინეზე) და მორტენ ფრენდრუპი (ჯენოა). ამ ფეხბურთელების მიმართ ინტერესი რეალური და დადასტურებულია.
ნაპოლი სხვა ნახევარმცველებსაც აკვირდება და დიდი შანსია დაინტერესებული ფეხბურთელების რაოდენობა უახლოეს კვირებში გაიზარდოს.
"პარტენოპეი" სერია A-ში 11 ტურის შემდეგ, 22 ქულით, მე-4 პოზიციაზე იმყოფება, ხოლო რაც შეეხება ჩემპიონთა ლიგას, ანტონიო კონტეს გუნდს 4 ტურის შემდეგ, 4 ქულა აქვს და 24-ე პოზიციას იკავებს.
