ნაპოლიში ახალი სეზონისთვის მზადება უკვე დაიწყეს. ნეაპოლურ გუნდს ზაფხულში რამდენიმე ფეხბურთელი დატოვებს, რაც იმას ნიშნავს, რომ "პარტენოპეის" საკმაოდ დატვირთული ზაფხულის სატრანსფერო ფანჯარა ელოდება.
უფროსობა რამდენიმე პოზიციის გაძლიერებას გეგმავს და როგორც ირკვევა, ერთ-ერთი პრიორიტეტული ახალი ფორვარდის დამატება იქნება. ცნობილია მთავარი სამიზნე — ნაპოლი ჯონათან დევიდის ტრანსფერზე მუშაობს! კანადელი ფორვარდი სეზონის ბოლოს ლილს თავისუფალი აგენტის სტატუსით დატოვებს, შესაბამისად, მის დამატებას ბევრი კლუბი შეეცდება, თუმცა "პარტენოპეი" დიდი კონკურენციის მიუხედავად ამ გარიგების დახურვას ცდილობს. როგორც ცნობილი ხდება, იტალიელებმა 25 წლის ფეხბურთელს საკმაოდ სოლიდური კონტრაქტი უკვე შესთავაზეს, უახლოეს კვირებში კი მხარეები საბოლოო შეთანხმებას შეეცდებიან.
ჯონათან დევიდის დამატებას სხვა ევროპული კლუბებიც ცდილობენ, მათ შორის კიდევ ერთი იტალიური გუნდი ინტერიც, შესაბამისად, ზაფხულის სატრანსფერო ფანჯრის მოახლოებასთან ერთად მოსალოდნელია მათი გააქტიურებაც. უახლოეს კვირებში კანადელი ფორვარდის ნაპოლიში პოტენციურ ტრანსფერთან დაკავშირებით უფრო მეტი ინფორმაცია გახდება ცნობილი.
ლილის ფორვარდი ფრანგული კლუბის ღირსებას 2020 წლიდან მოყოლებული იცავს. ფეხბურთელმა ამ დროში 231 მატჩის ჩატარება მოასწრო, გაიტანა 109 გოლი და 30 საგოლე გადაცემაც შეასრულა. ჯონათან დევიდი ახალ სეზონს, ახალ გუნდში დაიწყებს, 25 წლის ფორვარდი ტოპ კლუბში გადასასვლელად ემზადება.
