ნაპოლის საკმაოდ აქტიური ზაფხულის სატრანსფერო ფანჯარა ჰქონდა, რაც სეზონის სტარტზე გუნდის პერფორმანსზეც კარგად აისახა. ანტონიო კონტეს გუნდს 3 ტურის შემდეგ 9 ქულა აქვს და ჩემპიონატს უდანაკარგოდ ლიდერობს. "პარტენოპეიმ" თითქმის ყველა პოზიცია გააძლიერა, მათ შორის ახალი მეკარეც დაიმატა, რამაც ალექს მერეტის გეგმები თავიდან ბოლომდე შეცვალა.
დაახლოებით ორი თვის წინ ვერავინ იფიქრებდა, რომ ალექს მერეტი ნაპოლიდან წასვლაზე სერიოზულად იფიქრებდა. მას შემდეგ, რაც მხარეებმა ივნისის თვეში ახალი ხელშეკრულება გააფორმეს, ყველა ფიქრობდა, რომ ნაპოლიში მეკარის პრობლემა დიდი ხნის განმავლობაში გადაიჭრა, თუმცა ამ ყველაფერს შემდეგ მოჰყვა ვანია მილინკოვიჩ-სავიჩის ტრანსფერი, რომელიც ანტონიო კონტემ პირადად მოითხოვა. "პარტენოპეიმ" 28 წლის სერბი მეკარის სანაცვლოდ საკმაოდ სოლიდური თანხა გადაიხადა — გამოცდილი კარის დარაჯი ნაპოლის პირველი ნომერი საკმაოდ მალე გახდა, ალექს მერეტი კი სკამზე გადაჯდა.
ეს მოცემულობა ალექს მერეტისთვის მიუღებელია და როგორც იტალიელთან დაახლოებული წყაროები საუბრობენ, 28 წლის მეკარე კლუბის დატოვებას სერიოზულად განიხილავს. სეზონის ბოლომდე სიტუაცია რადიკალურად თუ არ შეიცვლება, ალექს მერეტი გუნდს აუცილებლად შეიცვლის.
