ნაპოლის ხელმძღვანელობისა და ახალი მწვრთნელის მთავარი მიზანი კვარაცხელიას შენარჩუნება იყო და ამ მიზანს აღწევენ კიდეც.
ევროპის ჩემპიონატის დასრულების შემდეგ, ხვიჩა ისვენებს და როგორც რამდენიმე დღის წინ მოგახსენეთ, ნაპოლის აგვისტოს დასაწყისში შეუერთდება.
LaGazzetta.ge-ს ინფორმაციით, ნაპოლის უკვე ყველაფერი მზად აქვს. კვარაცხელიას ახალი კონტრაქტი, რომლის მიხედვითაც ის დაახლოებით 3-ჯერ მეტ ხელფასს მიიღებს, მზადაა და მხოლოდ ოფიციალური მხარეა დარჩენილი. ახალი კონტრაქტის მიხედვით, კვარაცხელია ნაპოლის საკუთრება 2028 წლამდე იქნება, თუმცა ამჟამინდელი კონტრაქტით ის ამ გუნდის საკუთრება 2027 წლამდე ისედაც არის.
ნაპოლის იტალიელი სპეციალისტი ანტონიო კონტე კვარაცხელიას გუნდის შეკრებაზე ელოდება, რათა იურიდიული საკითხები საბოლოოდ მოგვარდეს და ნაპოლის ლიდერმა ახალი სეზონისთვის მზადება სრულფასოვნად დაიწყოს.
არადა, მიმდინარე ზაფხულს ხვიჩას შეძენით ჯერ ბარსელონა ინტერესდებოდა, შემდეგ კი - პსჟ. მიმდინარე პროცესების გათვალისწინებით, მოლაპარაკებები ნელ-ნელა უკან მიდის.
