ევროპის მასშტაბით ტოპ კლუბები 2026 წლის პოტენციურ ტრანსფერებზე ფიქრს უკვე იწყებენ. ამ სიაში არიან წამყვანი ევროპული გუნდები მათ შორის ბაიერნი, ლივერპული, ბარსელონა, იუვენტუსი და რეალ მადრიდი. დადასტურებულად შეგვიძლია იმის თქმა, რომ ეს კლუბები მომავალ წელს ახალ ცენტრალურ მცველს აუცილებლად დაიმატებენ, პოტენციურ სამიზნეებზე ინფორმაცია კი უკვე ვრცელდება.
ზემოხსენებული ტოპ კლუბების ერთ-ერთი მთავარი სამიზნე დორტმუნდის 25 წლის ცენტრალური მცველი ნიკო შლოტერბეკია! დიახ, ხუთივე კლუბის ინტერესი რეალური და დადასტურებულია. მეტიც, როგორც ლივერპულის წარმომადგენლები, ისე ბაიერნის უფროსობაც უახლოეს პერიოდში ნიკო შლოტერბეკის აგენტს დაუკავშირდებიან, სადაც მხარეები პოტენციურ ტრანსფერზე ისაუბრებენ. დორტმუნდს დაცვის უდავო ლიდერის შენარჩუნება სურს, თუმცა მხარეები ახალ კონტრაქტზე ვერ თანხმდებიან, რაც "შავ-ყვითლებს" საქმეს ძალიან ურთულებს. შეგახსენებთ, ნიკო შლოტერბეკს BVB-სთან არსებული ხელშეკრულება 2027 წლამდე აკავშირებს. რაც შეეხება თავად ფეხბურთელის პოზიციას, როგორც ირკვევა ნიკო დორტმუნდში ბედნიერია, თუმცა 2026 წელს ყველა შემოთავაზების განხილვას გეგმავს.
2026 წლის დადგომასთან ერთად, ნიკო შლოტერბეკის თაობაზე უფრო მეტი ინფორმაცია გახდება ცნობილი. ზემოხსენებული კლუბების გარდა მოსალოდნელია, რომ საქმეში სხვა ტოპ კლუბებიც ჩაერთვებიან, რადგან როგორც უკვე ვახსენეთ, გერმანელ ცენტრალურ მცველს დორტმუნდთან არსებული კონტრაქტი მალე ეწურება, მისი შეძენა კი საკმაოდ დაბალ ფასად იქნება შესაძლებელი.
