ბარსელონაში ახალი სეზონისთვის მზადებას აქტიურად აგრძელებენ. ჰანსი ფლიკის გუნდი ჟოან გარსიას შემდეგ, მიმდინარე სატრანსფერო ფანჯარაზე 4-5 ფეხბურთელის დამატებას კიდევ გეგმავს. შემდეგი მოთამაშე, რომლის ყიდვასაც კატალონიური კლუბი შეეცდება ნიკო უილიამსია. ბარსელონასა და 22 წლის ფეხბურთელს შორის წინასწარი სიტყვიერი შეთანხმება უკვე არსებობს, თუმცა ესპანური კლუბი ვინგერის კონტრაქტში ჩაწერილ გამოსასყიდ თანხას ამ დრომდე ვერ იხდის.
ესპანურ პრესაში ბოლო საათებში ურთიერთგამომრიცხავი სიახლეები ვრცელდება. რამდენიმე გამოცემის ინფორმაციით, ნიკო უილიამსის აგენტი გარიგებას აფერხებს, რადგან ბარსელონა გარანტიებს ვერ იძლევა. მას შემდეგ, რაც კლუბს დანი ოლმოსა და პაუ ვიქტორის თაობაზე სირთულეები შეექმნა, ამ ყველაფერმა უარყოფითი გავლენა მოახდინა, ნიკო უილიამსის წარმომადგენლებს კი მსგავსი სცენარის გამეორება არ სურთ — ისინი გარანტიებს ითხოვენ!
ზემოხსენებულ ინფორმაციას ბარსელონასთან დაახლოებულმა წყაროებმა უპასუხეს და განაცხადეს, რომ ნიკო უილიამსი მოლოდინის რეჟიმშია და კარიერის გაგრძელება მხოლოდ ბარსელონაში სურს. ესპანელს სჯერა, რომ კატალონიელები არსებულ პრობლემებს მოაგვარებენ და გამოსასყიდ თანხას უახლოეს დღეებში გადაიხდიან.
ახალი ფინანსური წლის დაწყებამდე ერთი დღით ადრე, ბარსელონამ გასული წელი ჩახურა, რაც იმას ნიშნავს, რომ კატალონიელებმა ნიკო უილიამსის გამოსასყიდი თანხა შესაძლოა ნებისმიერ მომენტში გადაიხადონ. ესპანელი ფეხბურთელის სიტუაციას ყურადღებით აკვირდებიან ბაიერნში. თუ ფეხბურთელის ბარსელონაში ტრანსფერი ჩაიშლება, გერმანელები საქმეში დაბრუნდებიან.
