მანჩესტერ იუნაიტედმა ანდრე ონანას შემცვლელი შეარჩია — ბოლო მომენტში რაიმე გაუთვალისწინებელი თუ არ მოხდა, სენ ლამენსი როიალ ანტვერპენიდან კარიერას ოლდ ტრაფორდზე გააგრძელებს! მხარეები შეთანხმებასთან ძალიან ახლოს არის და თუ ყველაფერი გეგმის მიხედვით წავა, 23 წლის მეკარე მომდევნო კვირაში მანჩესტერ იუნაიტედის ფეხბურთელი ოფიციალურად გახდება! კლუბები დაახლოებით €20 მილიონიან გარიგებაზე მუშაობენ.
როგორც დღეს გაირკვა, მანჩესტერ იუნაიტედი 23 წლის მეკარეს რამდენიმე თვეა, რაც აკვირდება, შესაბამისად, ბელგიელი ფეხბურთელის კანდიდატურა კლუბში ყოველთვის მოსწონდათ. "წითელი ეშმაკები" ახალი მეკარის პოზიციაზე სხვა ვარიანტებსაც განიხილავდნენ, თუმცა ყველას მაინც სენ ლამენსმა აჯობა.
იმის მიუხედავად, რომ მანჩესტერ იუნაიტედმა ანდრე ონანას გაყიდვა ჯერჯერობით ვერ მოახერხა, კლუბში გადაწყვიტეს, რომ ახალი მეკარის დამატება სასიცოცხლოდ მნიშვნელოვანი იყო, სწორედ ამიტომ ანტვერპენთან მოლაპარაკებები დაჩქარებული წესით დაიწყო.
სენ ლამენსი ბრიუგეს აკადემიის აღზრდილია, ხოლო ანტვერპენის ღირსებას 2023 წლიდან მოყოლებული იცავდა. ბელგიელმა მეკარემ ამ დროში 64 მატჩის ჩატარება მოასწრო, კარი მშრალად კი 12-ჯერ შეინახა.
