იმის მიუხედავად, რომ მიმდინარე სეზონის დასრულებამდე რამდენიმე თვეა დარჩენილი, პორტუგალიური გამოცემები სპორტინგის, ბენფიკასა და პორტუს ზაფხულის გეგმებზე უკვე ბევრს წერენ.
ამ შემთხვევაში ჩვენი სასაუბრო თემა რა თქმა უნდა სპორტინგი იქნება, სადაც საქართველოს ეროვნული ნაკრების წევრი გიორგი ქოჩორაშვილი ირიცხება. პორტუგალიური გამოცემების ინფორმაციით, სპორტინგმა რამდენიმე ფეხბურთელი ტრანსფერზე უკვე დააყენა და ზაფხულში მათ სანაცვლოდ ყველა შეთავაზებას განიხილავს — ამ სიაში მოხვდა 26 წლის ქართველი ნახევარმცველიც. როგორც ადგილობრივი პრესა წერს, ზაფხულის სატრანსფერო ფანჯრის დროს გიორგი ქოჩორაშვილის ახალ გუნდში გადასვლა ორივე მხარისთვის მომგებიანი იქნება.
გიორგი ქოჩორაშვილს, რომ საკმაოდ რთული სეზონი აქვს ეს მის სტატისტიკაზეც მეტყველებს. ქართველმა ფეხბურთელმა ამ სეზონში 22 მატჩში მიიღო მონაწილეობა, თუმცა მოედანზე მხოლოდ 862 წუთი გაატარა, რაც ძალიან ცოტაა.
შეგახსენებთ, ზამთრის სატრანსფერო ფანჯრის ბოლო დღეებში რამდენიმე ესპანური კლუბი გიორგი ქოჩორაშვილის იჯარით დამატებას განიხილავდა, თუმცა ქართველმა ნახევარმცველმა სეზონის ბოლომდე სპორტინგში დარჩენა არჩია და გუნდი არ დატოვა. რა იქნება ზაფხულში ამას მხოლოდ დრო გვიჩვენებს, თუმცა დღევანდელი მოცემულობით საკმაოდ დიდი შანსია 26 წლის ფეხბურთელმა ახალი სეზონი, ახალ გუნდში დაიწყოს.
