რამდენიმე თვის წინ, ასეთ რთულ სიტუაციას ვერც ფეხბურთელი წარმოიდგენდა და ვერც აურელიო დე ლაურენტისი. ნიგერიელი ფორვარდის ტრანსფერზე ჯერ პსჟ მუშაობდა, შემდეგ ჩელსი, ბოლოს კი ალ-აჰლი, თუმცა არც ერთ კლუბში ტრანსფერი არ შემდგარა. იმის მიუხედავად, რომ რამდენიმე საათის წინ ნაპოლი და ალ-აჰლი ტრანსფერზე შეთანხმდნენ, ოსიმენმა ამ გარიგებას მწვანე შუქი არ აუნთო და ტრანსფერიც არ შედგა. მოსალოდნელი იყო ჩელსის გააქტიურებაც, თუმცა არც ლონდონელებმა მოინდომეს ფეხბურთელის დამატება.
რა მოხდება ახლა?
პირველ რიგში, ნაპოლიმ ფეხბურთელს დაანახა, რომ ის გუნდის გეგმებში აღარ შედის — უკვე ოფიციალურად, ოსიმენის #9 ნომერი გუნდის ახალწვეულმა, რომელუ ლუკაკუმ აიღო, რაც საკმაოდ ბევრ რამეზე მეტყველებს. დე ლაურენტისმა 2023 წლის მიწურულს, ოსიმენს კონტრაქტი სიმბოლურად გაუხანგრძლივა, თუმცა ეს სიმბოლური კონტრაქტი ახლა ძალიან დიდი პრობლემა გახდა. ხელშეკრულების 2026 წლამდე გახანგრძლივების შემდეგ, ოსიმენის წლიური ხელფასი €10 მილიონი გახდა, გამოსასყტიდი თანხა კი €130 მილიონამდე გაიზარდა. ვინაიდან ფეხბურთელის სხვა კლუბში ტრანსფერი არ შედგა, ნაპოლიმ ფეხბურთელს საკმაოდ დიდი ხელფასი იქამდე უნდა გადაუხადოს, სანამ გუნდს არ დატოვებს.
საუდის ლიგაში სატრანსფერო ფანჯარა ჯერ კიდევ ღიაა, შესაბამისად, ნაპოლიში იმედოვნებენ, რომ რომელიმე კლუბი ოსიმენის ყიდვას გადაწყვეტს. იმის მიუხედავად, რომ ფეხბურთელს ამ ჩემპიონატში კარიერის გაგრძელება არ სურდა, ახლა სხვა გზა აღარ რჩება. დრო 2 სექტემბრამდეა, ნაპოლი და ოსიმენი კი მოლოდინის რეჟიმში არიან.
დღეს კონტეს გუნდი პარმას უმასპინძლებს და ოსიმენი, რა თქმა უნდა, განაცხადში არ იქნება. უახლოეს დღეებში ნიგერიელი ფორვარდის პოტენციურ ტრანსფერთან დაკავშირებით, უფრო მეტ სიახლეს შევიტყობთ.
