დადასტურებულად — პსჟ ზაფხულის სატრანსფერო ფანჯრის დახურვამდე ჯანლუიჯი დონარუმას თაობაზე ყველა შეთავაზებას განიხილავს. უფროსობამ იტალიელ მეკარეს უკვე განუცხადა, რომ ისინი არ აპირებენ ფეხბურთელის მოთხოვნების დაკმაყოფილებას, რასაც ლუის ენრიკეს გადაწყვეტილებაც ემატება - მომდევნო სეზონში გუნდის პირველი ნომერი პარიზული კლუბის ახალწვეული ლუკას შევალიე იქნება.
დიახ, პარი სენ-ჟერმენში საკმაოდ მოულოდნელი გადაწყვეტილება მიიღეს, თუმცა ამ ყველაფერს თავისი ახსნა აქვს. როგორც მოგეხსენებათ, პსჟ და ჯანლუიჯი დონარუმა ახალ კონტრაქტზე ერთ წელზე მეტია, რაც მუშაობენ, თუმცა მხარეები შეთანხმებას ამ დრომდე ვერ ახერხებენ. ამის მთავარი მიზეზი კი იტალიელის მოთხოვნებია — 26 წლის მეკარეს კლუბთან არსებული კონტრაქტი 2026 წლამდე აკავშირებს, მისი წლიური ანაზღაურება კი არც მეტი, არც ნაკლები €10 მილიონია. პსჟ ფეხბურთელისთვის ახალი კონტრაქტის შეთავაზებას გეგმავდა, თუმცა სიტუაცია მას შემდეგ შეიცვალა, რაც იტალიელის აგენტმა ხელფასის გაზრდა €12-13 მილიონამდე მოითხოვა.
დონარუმას აგენტის მოთხოვნების გამო, კლუბმა ახალი მეკარის დამატება გადაწყვიტა, არჩევანი კი ლილის 23 წლის კარის დარაჯზე ლუკას შევალიეზე შეჩერდა. ახალგაზრდა ფრანგმა ახალ კლუბში სამედიცინო შემოწმება უკვე გაიარა და გუნდთან ერთად მომდევნო სეზონისთვის მზადებას შეუდგა.
რაც შეეხება ჯანლუიჯი დონარუმას ქეისს, პარიზელებს ფეხბურთელის გაყიდვა 1 სექტემბრამდე სურთ, რადგან მათ გეგმებში იტალიელის მომავალ წელს უფასოდ დაკარგვა არ შედის. ამ მომენტისთვის პარი სენ-ჟერმენს დონარუმას სანაცვლოდ ოფიციალური შეთავაზება არ მიუღია, თუმცა ჯიჯიოს გარშემო საუბრები არ წყდება და დიდი შანსია უახლოეს დღეებში ევროპის მასშტაბით სხვადასხვა კლუბები უფრო მეტად გააქტიურდნენ.
