ლივერპული ალექსანდერ ისაკის ტრანსფერზე მუშაობს! დიახ, მერსისაიდელებსა და ნიუკასლს შორის პირველი კონტაქტი უკვე შედგა, სადაც მხარეებმა პოტენციურ გარიგებაზე ისაუბრეს. იმის მიუხედავად, რომ "კაჭკაჭებს" შვედი ფორვარდის შენარჩუნება სურთ, არნე სლოტის გუნდი ამ ტრანსფერზე მუშაობას მაინც აგრძელებს. როგორც ირკვევა, ნიუკასლი 25 წლის ფეხბურთელს დაახლოებით £150 მილიონად აფასებს, რის შესახებაც ლივერპულში ინფორმირებულნი არიან. მერსისაიდელები პირველ ოფიციალურ შეთავაზებას ამზადებენ!
ენფილდის ბინადრები, რომ ახალი ფორვარდის დამატებას გეგმავდნენ, ამის შესახებ რამდენიმე თვის წინ გაცნობეთ. ლივერპულის პოტენციურ სამიზნეებშია უგო ეკიტიკეც, რომლის ტრანსფერზე ნიუკასლიც მუშაობს, შესაბამისად, ამ ორი ფეხბურთელის გარიგება ერთმანეთთან დაკავშირებულია.
უახლოეს დღეებში, ზემოხსენებული ფეხბურთელების პოტენციურ ტრანსფერებთან დაკავშირებით უფრო მეტი ინფორმაცია გახდება ცნობილი. თუმცა, ერთი რამ ფაქტია, ისაკისა და ეკიტიკეს მომავალი ერთმანეთთან დაკავშირებულია, რაც მათ მომავალს კიდევ უფრო საინტერესოს ხდის.
ალექსანდერ ისაკი ნიუკასლის ღირსებას 2022 წლიდან მოყოლებული იცავს. ამ დროში ფეხბურთელმა 109 მატჩის ჩატარება მოასწრო, გაიტანა 62 გოლი და 11 საგოლე გადაცემითაც გამოიჩინა თავი. ხოლო რაც შეეხება უგო ეკიტიკეს, ფრანგი ფორვარდი აინტრახტში 2024 წლიდან მოყოლებული თამაშობს. ფეხბურთელმა ამ დროში 64 მატჩის ჩატარება მოასწრო, გაიტანა 26 გოლი და 14 ასისტიც შეასრულა.
