რომა გიორგი მიქაუტაძის ტრანსფერზე მუშაობას აგრძელებს. როგორც La Gazzetta dello Sport-ის დღევანდელ გამოცემაში ვკითხულობთ, დედაქალაქურმა კლუბმა ქართველი ფეხბურთელის თაობაზე პირველი შეთავაზება უკვე გააკეთა — საუბარია €18 მილიონზე! ამავე სტატიაზე დაყრდნობით იმასაც ვიგებთ, რომ ლიონი 24 წლის ფორვარდს მინიმუმ €20 მილიონად აფასებს, შესაბამისად, რომას შეთავაზების გაზრდა მოუწევს.
La Gazzetta dello Sport-ის ინფორმაციით, ქართველი ფორვარდით სანდერლენდი, ფენერბაჰჩე და გალათასარაიც სერიოზულად ინტერესდებიან.
რომა, რომ გიორგი მიქაუტაძის დამატებას სერიოზულად განიხილავდა, ამის შესახებ რამდენიმე დღის წინ უკვე გაცნობეთ. ლიონის ლიდერები გუნდის დასატოვებლად ემზადებიან და დიდი შანსია ამ სიაში ქართველი ფეხბურთელიც მოხვდეს.
რაც შეეხება ფრანგული კლუბის ფინანსურ პრობლემებს, ლიონს 10 ივლისს სააპელაციო სასამართლო ელის, სადაც "Les Gones" საფრანგეთის ფეხბურთის ასოციაციის დასკვნას გააპროტესტებს.
