ზაფხულის სატრანსფერო ფანჯრის დახურვამდე 6 დღით ადრე, ინგლისური მედია ჩელსის თაობაზე საინტერესო ინფორმაციას ავრცელებს. როგორც ირკვევა, ლონდონური კლუბი ბარსელონას 22 წლის ტალანტის ფერმინ ლოპესის ტრანსფერზე მუშაობს! ენცო მარესკას გუნდი ახალგაზრდა ფეხბურთელის შეძენას სერიოზულად განიხილავს და დიდი შანსია უახლოეს საათებში პირველი ოფიციალური შეთავაზებაც გაკეთდეს.
ბარსელონას ფერმინ ლოპესის გაყიდვა არ სურს, თუმცა კლუბის ფინანსური პრობლემებიდან გამომდინარე, დიდი ალბათობით ესპანელის სანაცვლოდ ყველა შეთავაზებას განიხილავენ. ახალგაზრდა ფეხბურთელს კატალონიურ კლუბთან არსებული კონტრაქტი 2029 წლამდე აკავშირებს, მისი სატრანსფერო ფასი კი დაახლოებით €50-60 მილიონია.
ფერმინ ლოპესი ბარსელონას აკადემიის აღზრდილია, პირველი გუნდის ღირსებას კი 2023 წლიდან მოყოლებული იცავს. ესპანელმა ამ დროში 89 მატჩის ჩატარება მოასწრო, გაიტანა 19 გოლი და 11 საგოლე გადაცემითაც გამოიჩინა თავი. ფერმინ ლოპესის პოტენციურ ტრანსფერთან დაკავშირებით უფრო მეტი ინფორმაცია უახლოეს საათებში გახდება ცნობილი.
