ევროპის მასშტაბით ტოპ კლუბები ზამთრის სატრანსფერო ფანჯრისთვის მზადებას უკვე შეუდგნენ. ამ სიაშია პარი სენ-ჟერმენიც, რომელიც იანვარში აქტიურობას გეგმავს. როგორც ირკვევა, ლუის ერნიკეს 2-3 ფეხბურთელის დამატება სურს, ერთ-ერთი მათგანი კი აუცილებლად მცველი უნდა იყოს.
დადასტურებულად შეგვიძლია იმის თქმა, რომ პსჟ ბარსელონას მცველით, ერიკ გარსიათი სერიოზულად ინტერესდება, მეტიც, პარიზელები პირველ შეთავაზებას უკვე ამზადებენ. ფრანგული გრანდში, რომ ესპანელი მცველი მოსწონთ, ამის შესახებ ზაფხულშიც ბევრი იწერებოდა, თუმცა მხარეებს შორის მოლაპარაკებები მაშინ არ გახსნილა.
იმის გათვალისწინებით, რომ ამ სეზონში პარი სენ-ჟერმენში ტრავმების ეპიდემიაა, ლუის ერნიკეს დაცვის გაძლიერება ისეთი ფეხბურთელით სურს, რომელიც რამდენიმე პოზიციას ფარავს, ერიკ გარსია კი ამ შემთხვევაში იდეალური კანდიდატურაა.
ერიკ გარსიას დამატება ფინანსურად ძალიან მარტივი იქნება, რადგან ესპანელ ფეხბურთელს ბარსელონასთან არსებული კონტრაქტი სეზონის ბოლოს ეწურება. პსჟ დიდი ალბათობით პირველ შეთავაზებას იანვრის თვეში გააკეთებს, თუმცა თუ კატალონიელებმა ტრანსფერზე უარი განაცხადეს, საკმაოდ დიდი შანსია 24 წლის ფეხბურთელი სეზონის ბოლოს პარი სენ-ჟერმენში თავისუფალი აგენტის სტატუსით გადაბარგდეს.
ჰანსი ფლიკს ერიკ გარსია ძალიან მოსწონს და მისი შენარჩუნებაც სურს — როგორც ცნობილია, კატალონიური კლუბი ახალ კონტრაქტზე მუშაობს, თუმცა მხარეები ხელშეკრულების გახანგრძლივებაზე შეთანხმებას ამ დრომდე ვერ ახერხებენ.
