როგორც რამდენიმე დღის წინ გითხარით, პარიზული კლუბი პორტის ნიჭიერი ფეხბურთელის, როდრიგო მორას ტრანსფერზე უკვე მუშაობს, თუმცა გუნდი ამაზე გაჩერებას არ აპირებს. როგორც ირკვევა, გუნდის სპორტული დირექტორი ლუიშ კამპუში, ბაიერნის გამოცდილი ნახევარმცველის იოზუა კიმიხის გადმობირებას ცდილობს! მხარეებს შორის პირველი კონტაქტი რამდენიმე კვირის წინ შედგა, ახლა კი ცნობილი ხდება, რომ 30 წლის ფეხბურთელს პსჟ-ს შეთავაზება მაგიდაზე უდევს.
იოზუა კიმიხი და ბაიერნი, რომ ახალ კონტრაქტზე ამ დრომდე ვერ თანხმდებიან, ამის შესახებ უკვე გაცნობეთ, პსჟ-ს ინტერესზე კი ბევრი გამოცემა წინა კვირებშიც საუბრობდა. საქმეში სხვა ტოპ კლუბებიც არიან, მაგალითად ინტერი, არსენალი და ლივერპული, თუმცა როგორც ჩანს ყველაზე მეტად ფრანგული გუნდი აქტიურობს.
თუ გერმანულ წყაროებს დავუჯერებთ, კიმიხს ახლა მხოლოდ ორი ვარიანტი აქვს: ბაიერნში დარჩენა ან პარიზში გადასვლა, თუმცა იმასაც ამბობენ, რომ ფეხბურთელი დიდი ალბათობით გადაწყვეტილებას ჯერ არ მიიღებს და სეზონის დასრულებას დაელოდება. სატრანსფერო ფანჯრის მოახლოებასთან ერთად, 30 წლის გერმანელის თაობაზე უფრო მეტი ინფორმაცია გახდება ცნობილი.
