მიმდინარე სეზონის იუვენტუსზე როცა ვსაუბრობთ, ყველა რა თქმა უნდა ქენან ილდიზის პერფორმანსსა და სათამაშო ფორმაზე ამახვილებს ყურადღებას. 20 წლის თურქი ვინგერი საოცარ ფორმაშია და თამამად შეგვიძლია იმის თქმა, რომ "ბიანკონერის" უდავო ლიდერია.
8 მატჩი, 2 გოლი და 4 საგოლე გადაცემა, რასაც ნაკრებში გატანილი 3 გოლიც ემატება — ეს ქენან ილდიზის მიმდინარე სეზონის სტატისტიკაა. კარგი სათამაშო ფორმის ფონზე კი მის გარშემო საუბრები არ წყდება.
იუვენტუსში ახალ კონტრაქტზე უკვე მუშაობენ და როგორც La Gazzetta dello Sport იუწყება, "ბიანკონერი" ახალგაზრდა ფეხბურთელს შეთავაზებას მალე გაუკეთებს. საუბარია გრძელვადიან ხელშეკრულებასა და საკმაოდ სოლიდურ ანაზღაურებაზე. ტურინული გრანდისთვის 20 წლის თურქი ფეხბურთელი ხელშეუხებელია.
რაც შეეხება ევროპულ გრანდებს, რომლებიც ქენან ილდიზის მიმართ ინტერესს იჩენენ — ბარსელონა, ჩელსი, არსენალი და მანჩესტერ იუნაიტედი თურქი ფეხბურთელის სიტუაციას ყურადღებით აკვირდებიან და მოსალოდნელია, რომ 2026 წელს უფრო მეტადაც გააქტიურდებიან.
ქენან ილდიზი იუვენტუსში თავს კარგად გრძნობს და გუნდის გამოცვლას არ აპირებს, თუმცა ზაფხულის სატრანსფერო ფანჯრის დროს ყველაფერი შეიძლება მოხდეს.
