მილანმა ახალი სეზონი საკმაოდ კარგად დაიწყო — მაქს ალეგრის გუნდს 11 ტურის შემდეგ 22 ქულა აქვს და ლიდერებს ინტერსა და რომას მხოლოდ 2 ქულით ჩამორჩება. "როსონერი" უკვე 11 მატჩია არ აგებს, რაც საკმაოდ შთამბეჭდავი შედეგია.
სან სიროს ბინადრები, რომ ასეთ კარგ ფორმაში არიან რაფა ლეაოს დიდი დამსახურებაც არის. იმის მიუხედავად, რომ 26 წლის პორტუგალიელმა სეზონის სტარტზე ტრავმა მიიღო, მას შემდეგ, რაც მოედანს დაუბრუნდა 4 გოლის გატანა მოახერხა, რასაც 1 საგოლე გადაცემაც დაუმატა.
რაფა ლეაოს კარგ თამაშს კლუბშიც დადებითად აფასებენ და თუ ზაფხულში პორტუგალიელის გაყიდვა სერიოზულად განიხილებოდა, ახლა სიტუაცია რადიკალურად შეიცვალა — "როსონერი" გუნდის ათიანის შენარჩუნებას გეგმავს! მილანი რაფა ლეაოს წარმომადგენლებს უკვე დაუკავშირდა, სადაც მხარეებმა არსებული ხელშეკრულების გახანგრძლივებაზე მუშაობა დაიწყეს.
პორტუგალიელ ფეხბურთელს მილანის დატოვება არ სურს, შესაბამისად, დიდი შანსია მხარეებმა შეთანხმებას მარტივად მიაღწიონ. შეგახსენებთ, რაფა ლეაოს კლუბთან არსებული ხელშეკრულება 2028 წლამდე აკავშირებს, ხოლო მილანს ამ კონტრაქტის მინიმუმ 2 ან 3 წლით გახანგრძლივება სურს.
რაფა ლეაო მილანის ღირსებას 2019 წლიდან მოყოლებული იცავს, პორტუგალიელმა ამ დროში 268 მატჩის ჩატარება მოასწრო, გაიტანა 75 გოლი და 63 საგოლე გადაცემითაც გამოიჩინა თავი.
