რამდენიმედღიანი მოლაპარაკებები საბოლოო შეთანხმებით დასრულდა, როდრიგო დე პოლი ატლეტიკო მადრიდიდან კარიერას ინტერ მაიამიში გააგრძელებს. მხარეებმა გარიგების ყველა დეტალი შეათანხმეს, 31 წლის ნახევარმცველს ამერიკაში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს.
იმის გათვალისწინებით, რომ როდრიგო დე პოლი მომავალ წელს თავისუფალი აგენტი ხდებოდა, ატლეტიკომ არგენტინელი ფეხბურთელის გაყიდვა გადაწყვიტა. განიხილებოდა კარიერის სამშობლოში გაგრძელებაც, თუმცა ყველა გუნდს ინტერ მაიამიმ აჯობა.
არგენტინელი ფეხბურთელი ატლეტიკო მადრიდის ღირსებას 2021 წლიდან მოყოლებული იცავს. როდრიგო დე პოლმა ამ დროში 187 მატჩის ჩატარება მოასწრო, გაიტანა 14 გოლი და 26 საგოლე გადაცემითაც გამოიჩინა თავი.
