ევროპის მასშტაბით კლუბებმა ზამთრის სატრანსფერო ფანჯრისთვის მზადება უკვე დაიწყეს. ამ სიაშია რომაც, რომელსაც წესით და რიგით დატვირთული იანვრის თვე ექნება.
ჯან პიერო გასპერინიმ მინიმუმ 3 ახალი ფეხბურთელის დამატება მოითხოვა, საიდანაც ერთ-ერთი აუცილებლად ფორვარდი უნდა იყოს. "ჯალოროსის" მთავარი სამიზნე კი უკვე ცნობილია და მას იტალიაში ყველა ძალიან კარგად იცნობს.
საუბარი რა თქმა უნდა ჯოშუა ზირკზეზეა! 24 წლის ფეხბურთელი რუბენ ამორიმის გეგმებში კვლავ არ შედის, რის გამოც დიდი შანსია 2026 წლის დასაწყისში მანჩესტერ იუნაიტედი დატოვოს. იმის მიუხედავად, რომ ჯოშუა ზირკზეს ოლდ ტრაფორდზე დარჩენა სურს, "წითელი ეშმაკები" ახალგაზრდა ფორვარდის სანაცვლოდ ყველა შეთავაზებას განიხილავენ.
რომაში ჯოშუა ზირკზე ძალიან მოსწონთ და როგორც ირკვევა, ტრანსფერზე მუშაობაც უკვე დაწყებულია — მხარეებს შორის პირველი კონტაქტი უკვე შედგა. ჯან პიერო გასპერინი თვლის, რომ ნიდერლანდელის დამატებით, რომას შეტევითი პოტენციალი საგრძნობლად გაიზრდება.
რაც შეეხება სხვა დაინტერესებულ კლუბებს, საქმეშია მილანიც, რომელიც ჯოშუა ზირკზეს დამატებასთან ძალიან ახლოს 2024 წელს იყო, თუმცა ფეხბურთელმა ბოლო მომენტში ინგლისში გადასვლა არჩია. როგორც ჩანს, "როსონერიში" 24 წლის ფეხბურთელზე კვლავ ფიქრობენ და თუ სანტიაგო ხიმენესი იანვარში გუნდს დატოვებს, მაქს ალეგრის გუნდი მზადაა სხვა დაინტერესებულ კლუბებს კონკურენცია გაუწიოს და ჯოშუა ზირკზე დაიმატოს.
ზამთრის სატრანსფერო ფანჯრის მოახლოებასთან ერთად, ჯოშუა ზირკზეს თაობაზე უფრო მეტი ინფორმაცია გახდება ცნობილი.
