ტრანსფერი დაიხურა — ლეონ ბეილი ასტონ ვილადან კარეირას რომაში გააგრძელებს. მხარეებს შორის ყველაფერი შეთანხმებულია, 28 წლის იამაიკელ ვინგერს იტალიაში უკვე ელოდებიან, სადაც ახალ კლუბში სამედიცინო შემოწმებას გაივლის და კონტრაქტს ხელს მოაწერს.
მხარეებს შორის 1-წლიანი საიჯარო ხელშეკრულება გაფორმდება, რაშიც "ჯალოროსი" დაახლოებით €2-3 მილიონს გადაიხდის. დედაქალაქულ კლუბს ლეონ ბეილის გამოსყიდვა სეზონის ბოლოს €22 მილიონად შეეძლება.
მას შემდეგ, რაც ჯეიდონ სანჩოს რომაში ტრანსფერი ჩაიშალა, ჯან პიერო გასპერინის გუნდმა ლეონ ბეილის ტრანსფერის დახურვა გადაწყვიტა. იმის მიუხედავად, რომ იტალიურ კლუბს ორივე ვინგერის დამატება სურდა, "ჯალოროსიმ" მხოლოდ იამაიკელის გარიგება დახურა.
ლეონ ბეილი ასტონ ვილას ღირსებას 2021 წლიდან მოყოლებული იცავდა. ფეხბურთელმა ამ დროში 144 მატჩის ჩატარება მოასწრო, გაიტანა 22 გოლი და 24 საგოლე გადაცემითაც გამოიჩინა თავი. რომა ამ ტრანსფერზე გაჩერებას არ აპირებს და 1 სექტემბრამდე, მინიმუმ 1 ფეხბურთელის შეძენას კიდევ გეგმავს.
