გავლენიანი იტალიური გამოცემები სანდრო ტონალის შესახებ საინტერესო ინფორმაციას ავრცელებენ — როგორც ირკვევა, 25 წლის ფეხბურთელს სამშობლოში თამაშის სურვილი კვლავ აქვს, თუმცა სერია A-ში მხოლოდ იმ პირობით დაბრუნდება თუ მისი ტრანსფერი მილანში შედგება! დიახ, იტალიელ ფეხბურთელთან დაახლოებული წყაროების ინფორმაციით, სანდრო ნიუკასლს თუ დატოვებს, მხოლოდ "როსონერიში" გადაბარდგება და სამშობლოში სხვა გუნდში თამაშს არც კი განიხილავს.
ყველამ კარგად იცის, რომ სანდრო ტონალის მილანის დატოვება არ სურდა და "როსონერიმ" იტალიელი ნახევარმცველი ძალით გაყიდა. ამის მიუხედავად, ერთ-ერთ გამორჩეულ იტალიელ ფეხბურთელს სან სიროზე დაბრუნება მაინც სურს და იმედოვნებს, რომ კარიერის დასრულებამდე მისი საყვარელი გუნდის მაისურით კიდევ ერთხელ ითამაშებს.
ზემოხსენებული სიახლე მას შემდეგ გავრცელდა, რაც სანდრო ტონალის მიმართ იუვენტუსის ინტერესზე კიდევ ერთხელ დაიწერა. ტურინული პრესის ინფორმაციით, "ბიანკონერი" მომდევნო წელს იტალიელი ნახევარმცველის დამატებას კიდევ ერთხელ შეეცდება, თუმცა როგორც ჩანს ფეხბურთელს სულ სხვა გეგმები აქვს.
რაც შეეხება ნიუკასლის პოზიციას, ედი ჰაუსთვის სანდრო ტონალი ხელშეუხებელია და კლუბი იტალიელის გაყიდვას უახლოეს პერიოდში არ აპირებს. თავად 25 წლის ფეხბურთელიც ბედნიერია ინგლისში და არც ის განიხილავს ჯერჯერობით გუნდის გამოცვლას, თუმცა მომავალში სიტუაცია თუ შეიცვლება, სანდრო ტონალი ყველაფერს გააკეთებს, რომ მის საყვარელ გუნდში, მილანში დაბრუნდეს.
შეგახსენებთ, სანდრო ტონალის ნიუკასლთან არსებული კონტრაქტი 2028 წლამდე აკავშირებს, მისი სატრანსფერო ფასი კი €80 მილიონზე მეტია.
